Operatori i Shpërndarjes së Energjisë Elektrike ka ndërmarrë një tjetër hap për të qenë më afër qytetarëve, njëkohësisht për të përmirësuar edhe cilësinë e shërbimit. Prej datës 1 nëntor ka nisur funksionimin sistemi call center, i cili funksionon 24 orë në 7 ditë të javës. Përmes tij qytetarët mund të paraqesin ankesa, të raportojnë mbi problematika të caktuara apo të kërkojnë informacion mbi shërbime të ndryshe që kompania ofron.

Po kështu, në dispozicion të të gjithë qytetarëve është edhe chatbox, një seksion ku mund të shkruajnë dhe marrin në kohë reale përgjigje mbi problematika të ndryshe. Prej fillimit janë mbi 2600 abonentët të cilët kanë informacion dhe zgjidhje përmes chatbox-it.

Zëvendëskryeministrja, njëherësh Ministër i Infrastrukturës dhe Energjisë, Belinda Balluku dhe administratori i OSHEE, Enea Karakaçi vizituan mjediset e OSHEE, ku janë vendosur edhe punonjësit të cilët janë pjesë e call center, ku u njohën edhe me efektin që ky shërbim i ri ka pasur në këto ditë të para.

Administratori Karakaçi sqaroi se tashmë OSHEE ka rritur numrin e shërbimeve të cilat ofrohen online, duke ju kursyer qytetarëve kohë dhe radhë pritjeje. “Ne kemi marrë disa nisma të reja. Kemi shtuar shërbimet online. Nga data 15 tetor kemi bërë vetëm online lidhjet e reja dhe vërtetimin e debisë. Kemi pasur nga 15 tetori 2100 vërtetime debie vetëm online, nuk kanë pasur asnjë komunikim as me zyrat e kujdesit ndaj klientit as ndonjë operator dhe po ashtu janë bërë rreth 600 aplikime për lidhjet e reja online. Call center pikërisht na ndihmon që të orientojë qytetarët sepse ka konsumatorë që kanë pyete si bëhet aplikimi dhe call center ka rol kryesor”, sqaroi Karakaçi.

Për Zëvendëskryeministren Balluku dixhitalizimi i shërbimeve, jo vetëm shkurton kohën dhe përmirëson cilësinë e shërbimit ndaj qytetarëve, por rrit njëkohësisht edhe transparencën.

“Këtu janë ndërmarrë një sërë hapash të rinj përsa i përket dixhitalizimit. Inovacioni sjell transparencë. Këtu kemi të bëjmë me abonentët të cilët kanë shumë të drejtë që të kenë dhe dyshimet e tyre mbi faturimin dhe mbi proceset teknologjike që ne kemi brenda OSHEE-së, ndaj inovacioni, dixhitalizimi sjell transparencë të plotë. Kjo është çka ne kërkojmë që të arrijmë në të ardhmen, që gjithçka të jetë e vendosur në matësat inteligjentë, gjithçka të jetë e aksesueshme nga telefoni i vetë abonentit, por të gjitha këto kanë nevojë për kohë dhe padyshim për pjesën e investime”, tha Balluku.

Ministrja e Infrastrukturës dhe Energjisë njoftoi më tej se ka nisur puna që përmes optimizimit të proceseve teknike dhe financiare të kompanive shtetërore të energjisë, të  vlerësohen mundësitë që duke nisur nga vitit i ardhshëm qytetarët shqiptarë të kenë një çmim më të mirë të energjisë.

“Siç e ka thënë edhe Kryeministri Rama, ne kemi marrë një porosi dhe prej kohësh punojmë me OSHEE-në, KESH dhe OST-në për të vlerësuar një ulje të energjisë elektrike duke nisur nga 1 janari i vitit 2025. Jemi në punë e sipër, në analizë e sipër, por jemi të sigurtë që do t’ia dalim që duke optimizuar proceset teknike edhe ato financiare të kompanive tona ne të kemi mundësi që nga 1 janari ti ofrojmë qytetarëve shqiptarë një çmim më të mirë për energjinë elektrike”, deklaroi Balluku.

042274141 është numri i call center për të gjithë qytetarët që mund të kontaktojnë për çdo problematikë apo për të marrë informacionin e nevojshëm.